Балқаш маңында үш карьер табылды; табиғатқа келтірілген зиян жарты миллиардқа жуық

ҚМА Қарағанды облысы бойынша департаменті Балқаш көлі маңындағы Саяқ ауылы төңірегінде темір және марганец кендерін заңсыз өндіру фактісін анықтады. Ведомство баспасөз қызметінің мәлімдеуінше, жұмыстарды “Vertex Co.” ЖШС мен “MiningMetall” ЖШС жүргізген, олардың жер қойнауын пайдалану құқығы және қажетті рұқсат құжаттары болмаған.

Жалдамалы жұмысшылар мен экскаватор, тиегіш, ұсақтау қондырғысы және аударып төккіш сияқты арнайы техника тартылған. Шикізат ұсақталып, одан әрі шығару және сату үшін теміржол стансасына тасымалданған.

Тексеру барысында ауқымды казу іздері бар үш карьер табылды. Шығарылған топырақтың жалпы көлемі 338 мың текше метр болған. Мамандардың есебінше, жерді қалпына келтіру үшін 485 миллион теңге қажет. Сот санкциясымен 2 арнайы техника бірлігіне, автокөлікке және коммерциялық нысанға тыйым салынды. Күдіктіге қатысты кепіл түріндегі бұлтартпау шарасы таңдалды. Тергеу жалғасуда.

Бұдан бұрын Жетісу облысында құны 1,5 миллиард теңге болатын 2,6 мың тонна алтын кенін заңсыз шығару әрекеті тоқтатылған. Кедендік құжаттарда ол мыс кені ретінде көрсетілген.