Oʻzbekneftegaz va CNPC yoqilgʻi yetkazib berish hamda M-25 avariyasini muhokama qildi

Oʻzbekneftegaz boshqaruv raisi Abdugʻani Sanginov 20 oktyabrda Xitoy milliy neft-gaz korporatsiyasi (CNPC) delegatsiyasi bilan uchrashdi. Delegatsiyaga bosh direktor Chjou Sinxuay boshchilik qildi. Kompaniya matbuat xizmatining xabariga koʻra, muzokaralarda geologik qidiruv, burgʻulash, seysmik tadqiqotlar, gaz qazib olish samaradorligi, raqamlashtirish va zamonaviy jihozlar yetkazib berish boʻyicha hamkorlikni kengaytirish masalalari koʻrib chiqildi. Kompaniyaning maʼlumotiga koʻra, CNPC bilan umumiy hamkorlik hajmi 1 milliard dollardan oshgan, ammo taqsimoti aytilmagan.

Muzokaralarning asosiy mavzularidan biri Surxondaryo viloyati Boysun tumanidagi «25 yillik mustaqillik» (M-25) gaz konida yuz bergan avariya boʻldi. Rejalashtirilgan ishlar qatoriga nazoratsiz gaz chiqishini toʻxtatish uchun maxsus qutqaruv quduqlarini burgʻulash kiradi. Sanginov iyun oyida CNPC tarkibidagi CCDC kompaniyasi avariya oqibatlarini bartaraf etishga jalb qilinganini maʼlum qilgan edi. Avariya oqibatlarini toʻliq bartaraf etish 2027-yilning birinchi yarmida rejalashtirilgan.

Muzokaralarda neft mahsulotlari yetkazib berish manbalarini diversifikatsiya qilish, jumladan Xitoydan Jet A-1 aviayoqilgʻisini uzoq muddatli yetkazib berish masalasi ham koʻrib chiqildi. Kompaniya qaysi mahsulotlar, qanday hajmda va qanday shartlarda yetkazib berilishi haqida hali aniqlik kiritmagan. Taklif etilgan masalalar orasida Toshkentda CNPC doimiy vakolatxonasini ochish hamda Gubkin nomidagi Rossiya davlat neft va gaz universitetining Toshkent filialini qoʻllab-quvvatlash ham bor.