Qosim-Jomart Toqayev Respublika kuni munosabati bilan qozogʻistonlik mehnat faxrilarini taqdirladi

Qozogʻiston Prezidenti Qosim-Jomart Toqayev Respublika kuni munosabati bilan oʻtkazilgan tantanali tadbirda mamlakat rivojlanishiga salmoqli hissa qoʻshgan fuqarolarni davlat mukofotlari bilan taqdirlashini eʼlon qildi. Tengrinews xabar berishicha, mukofot sohiblari orasida ishchi kasblari vakillari, madaniyat arboblari, oʻqituvchilar, olimlar va tibbiyot xodimlari bor.

Metallurg Abdrashit Dospanov 40 yildan ortiq vaqtdan beri sohada ishlaydi va otasining kasbini davom ettirmoqda. Unga «Qozogʻistonning Mehnat qahramoni» unvoni berildi. Bastakor Altinbek Korazbayev «Otan» ordeni, taniqli alpinist Kazbek Validev esa II darajali «Baris» ordeni bilan mukofotlandi.

Oʻqituvchi Natalya Safiulina «Qozogʻistonning xizmat koʻrsatgan oʻqituvchisi», opera xonandasi Talgat Musabayev esa «Qozogʻistonning xalq artisti» unvonini oldi. Tibbiyot xodimlari Anar Abdikulova va Salima Jumamuratova «Shapagat» medali bilan taqdirlandi. Jami 129 nafar mehnat faxriysi, 473 nafar sanoat va qurilish xodimi, 200 dan ortiq kichik va oʻrta biznes vakili, 150 dan ortiq oʻqituvchi va olim, qariyb 120 nafar tibbiyot xodimi davlat mukofotiga sazovor boʻldi.