Qozogʻiston Ozarbayjon orqali neft yetkazib berishni kengaytirmoqchi

Qozogʻiston Transkaspiy yoʻnalishi orqali Ozarbayjon hududidan neft yetkazib berishni kengaytirishni rejalashtirmoqda. Bu haqida milliy kompaniya KazMunayGaz boshqaruv raisi Asxat Hasenov jurnalistlar savollariga javob berayotganda maʼlum qilgan. Xabar Day.az tomonidan Qozogʻiston ommaviy axborot vositalariga tayanib yoritilgan.

Hasenovning aytishicha, kompaniya Kaspiy dengizi orqali neft tashish hajmini oshirishni niyat qilgan. Biroq bu yoʻnalish imkoniyatlari hozircha CPC orqali yetkazib berish hajmlari bilan solishtirib boʻlmaydigan darajada. U boshqa neft qazib oluvchi korxonalarning ham Transkaspiy yoʻnalishiga qiziqishi ortayotganini qayd etgan.

Yetkazib berishning yanada oshishi iqtisodiy sharoitlarga, jumladan tashish tariflariga bogʻliq. Hasenov shunday degan: “Bizning vazifamiz hajmlarni oshirish. Biz buning ustida doimiy ishlayapmiz. Statistikani bilasiz, bu yoʻnalishda har yili oshish bor. Qiziqish katta.”