Armaniston aʼzolik badallarini toʻlamagani uchun KXSHTdan chiqarilishi mumkin

Armaniston aʼzolik badallarini toʻlamagani uchun Kollektiv xavfsizlik shartnomasi tashkilotidan (KXSHT) chiqarib yuborilishi mumkin. Bu haqda tashkilot bosh kotibi Taalatbek Masadikov maʼlum qildi, deb xabar berdi RIA Novosti.

Masadikovning fikricha, hozir yuz berayotgan holatlarni KXSHT Ustavining 20-moddasi deb hisoblash mumkin: aʼzolik badallari toʻlanmayapti, kvota oʻrinlari toʻldirilmayapti va ovoz berish huquqi yoʻq. Uning taʼkidlashicha, masala 11-noyabr kuni Moskvada boʻlib oʻtadigan Kollektiv xavfsizlik kengashi yigʻilishida muhokama qilinishi mumkin.

Yerevan 2024-yil boshida KXSHT byudjetiga aʼzolik badallarini toʻlashni toʻxtatgan edi. Bosh vazir Nikol Pashinyan respublikaning tashkilotdagi ishtiroki muzlatilganini eʼlon qilib, buni togʻli Qorabogʻ mojarosi bilan izohlagan. Pashinyanning daʼvosicha, shartnomaga aʼzo kamida ikki davlat Ozarbayjonga Armaniston bilan urushga tayyorgarlikda yordam bergan, Yerevanga esa faqat nomigagina yordam koʻrsatilgan. Ammo mamlakat nomlari aytilmagan.