Oʻzbekistonda Psixologiya ilmiy-tadqiqot instituti tashkil etiladi

Oʻzbekistonda Psixologiya ilmiy-tadqiqot instituti tashkil etiladi. Bu prezidentning 19-oktyabrdagi uzluksiz taʼlim tizimida psixologik xizmat sohasini ilmiy asosda rivojlantirish chora-tadbirlari toʻgʻrisidagi qarorida belgilandi.

Hujjatga koʻra, institut psixologiya sohasida ilmiy tadqiqotlar olib boradi, kadrlarni qayta tayyorlaydi va malakasini oshiradi hamda psixologik xizmatni takomillashtirish boʻyicha yagona ilmiy-uslubiy yondashuvni shakllantiradi. Faoliyatida taʼlim oluvchilarning psixologik rivojlanishi, bilim olish motivatsiyasi, akademik stress va ijtimoiy moslashuvga alohida eʼtibor qaratiladi.

2027-yil 1-yanvardan institutda uchta laboratoriya ishga tushadi. Taʼlim muassasalarida pedagog va oʻquvchilar bir oʻquv yilida kamida bir marta psixologik diagnostikadan oʻtadi; bu tartib 2026/2027-oʻquv yilidan maktabgacha va umumiy oʻrta taʼlimda, 2027/2028-oʻquv yilidan esa oʻrta maxsus, kasbiy va oliy taʼlimda joriy etiladi. Oʻquv yili davomida eng yuqori natija koʻrsatgan 150 nafar mentor psixolog bir martalik ragʻbatlantiriladi. Qaror ijrosi uchun taʼlim va ilm-fan vaziri Erkin Turdimov masʼul etib belgilangan.