Özbəkistanda Psixologiya Elmi-Tədqiqat İnstitutu yaradılır

Özbəkistanda Psixologiya Elmi-Tədqiqat İnstitutu yaradılır. Bu, Prezidentin 19 oktyabr tarixli, ümumi təhsil sistemində psixoloji xidmət sahəsinin elmi əsasda inkişafına dair tədbirlər haqqında qərarında müəyyən edilib.

İnstitut psixologiya sahəsində elmi tədqiqatlar aparacaq, kadrların yenidən hazırlanması və ixtisasının artırılması ilə məşğul olacaq və psixoloji xidmətin təkmilləşdirilməsi üçün vahid elmi-metodik yanaşma formalaşdıracaq. Təhsil alanların psixoloji inkişafı, öyrənmə motivasiyası, akademik stress və sosial uyğunlaşma məsələlərinə xüsusi diqqət veriləcək.

2027-ci il yanvarın 1-dən institutda üç laboratoriya fəaliyyətə başlayacaq. Təhsil müəssisələrində pedaqoqlar və şagirdlər il ərzində ən azı bir dəfə psixoloji diaqnostikadan keçiriləcək. Tədris ili ərzində ən yüksək nəticə göstərən 150 mentor psixoloq dövlət büdcəsi hesabına birdəfəlik mükafatlandırılacaq. Qərarın icrasına Erkin Turdimov cavabdeh təyin edilib.