Oʻzbekistonda banklar va notariuslar qogʻoz hujjat oʻrniga elektron hujjatni qabul qiladi

Oʻzbekistonda bir qator xizmatlarni olishda fuqarolar qogʻoz nusxalar oʻrniga hujjatlarning elektron versiyalarini taqdim etishlari mumkin boʻladi. Bu haqda Adliya vazirligi xabar berdi. Tegishli idoraviy hujjatlar 20-oktyabrda roʻyxatdan oʻtkazilgan va ularga asosan 33 ta idoraviy hujjatga oʻzgartirish va qoʻshimchalar kiritilgan.

Biometrik pasport, ID-karta, tugʻilish va nikoh guvohnomalari, pensiya guvohnomasi, nogironlik toʻgʻrisidagi maʼlumotnoma, urush ishtirokchisi guvohnomalari hamda talaba guvohnomasining elektron versiyalarini my.gov.uz portali va Ijtimoiy karta mobil ilovasi orqali taqdim etish mumkin boʻladi. Elektron hujjatlar bank xizmatlari va ayrim moliyaviy operatsiyalarda shaxsni tasdiqlashda, notarial harakatlarda, ichki aviareyslarga roʻyxatdan oʻtishda, urush ishtirokchilariga kompensatsiya toʻlashda hamda telekommunikatsiya xizmatlari shartnomalarini tuzishda qabul qilinadi.

Shuningdek, qon va uning komponentlarini topshiruvchi donorlarning shaxsini tasdiqlashda, lombardlar bilan shartnomalar tuzishda, ijtimoiy-tibbiy muassasalarda pulli xizmatlar olishda va harbiy hisobga qoʻyishda ham foydalaniladi. Elektron hujjatlardan boshqa bir qator xizmatlarni olishda ham foydalanish mumkin boʻladi.