Oʻzbekiston COP31da 2035 yilgacha emissiyani 50% ga qisqartirish maqsadini taqdim etadi

Oʻzbekiston 9–20 noyabrda Antaliyada (Turkiya) boʻlib oʻtadigan BMTning Iqlim oʻzgarishi boʻyicha Ramka konvensiyasi Tomonlarining 31-konferensiyasida (COP31) yangilangan milliy darajada belgilangan hissa (NDC 3.0) ni taqdim etadi. Hujjatga koʻra, mamlakat 2035 yilga borib YaIM birligiga toʻgʻri keladigan issiqxona gazlari emissiyasini 2010 yil darajasiga nisbatan 50 foizga qisqartirishni rejalashtirmoqda. Bu haqda Oʻzbekistonning Ekologiya va iqlim oʻzgarishi milliy qoʻmitasi xabar berdi.

Konferensiyada yashil energetika, energiya samaradorligi, zamonaviy texnologiyalar va iqtisodiy tarmoqlarning iqlim oʻzgarishiga chidamliligi boʻyicha milliy yondashuvlar taqdim etiladi. Asosiy tadbirlardan biri iqlim migratsiyasi va xalqaro hamkorlikka bagʻishlanadi. Milliy paviliondagi yuqori darajadagi tadbirda Markaziy Osiyo va Janubiy Kavkaz davlatlarining «Ipak yoʻli deklaratsiyasi» (Silk Road Declaration) qabul qilinishi rejalashtirilgan.

Oʻzbekiston shuningdek «Yashil makon» milliy loyihasi va Orol dengizi qurigan tubida oʻrmon ekish tashabbuslarini ham taqdim etadi. Qoʻmitaning bahosiga koʻra, ishtirok mamlakatning iqlim moliyalashtirishini olish imkoniyatlarini kengaytiradi.