Toqayev: Qozogʻistonda aholi jon boshiga YaIM 15 ming dollardan oshdi

Qozogʻiston Prezidenti Qosim-Jomart Toqayev mamlakat iqtisodiyotining oʻsishi va fuqarolar farovonligidagi yutuqlar haqida gapirdi. Uning soʻzlariga koʻra, 2019-yildan beri iqtisodiyot taxminan 30 foizga oʻsgan, aholi jon boshiga YaIM esa 15 ming dollardan oshgan. «Milliy fond – bolalarga» loyihasi doirasida 7 million bola hisobvaraqlariga 2,5 milliard dollar oʻtkazilgan.

Oʻtgan yili 20 million kvadrat metrdan ortiq uy-joy foydalanishga topshirildi; Toqayev buni ilgari koʻrilmagan koʻrsatkich deb atadi. Oʻrtacha umr koʻrish davomiyligi 76 yilga yaqinlashdi. Toqayev Jahon banki maʼlumotlariga koʻra, Qozogʻiston bu koʻrsatkich boʻyicha mintaqada yetakchi ekanini qayd etdi.

Prezident, shuningdek, mamlakatning dunyodagi eng nufuzli davlatlar qatorida 34-oʻrinni egallagani, yalpi ichki mahsulot hajmi 350 milliard dollarga yaqinlashgani va MDH ichida ikkinchi oʻrinda turgani haqida aytdi. Kichik va oʻrta biznesning YaIMdagi ulushi 40 foizga yetgan, mehnatga layoqatli aholining deyarli yarmi shu sohada ishlaydi.