Тоқаев: Қазақстанда жан басына шаққандағы ІЖӨ 15 мың доллардан асты

Қазақстан Президенті Қасым-Жомарт Тоқаев ел экономикасының өсуі мен азаматтардың әл-ауқатының артуы туралы айтты. Оның сөзінше, 2019 жылдан бері экономика шамамен 30 пайызға өсті, ал жан басына шаққандағы ІЖӨ 15 мың доллардан асты. «Ұлттық қор – балаларға» жобасы аясында 7 миллион баланың шотына 2,5 млрд доллар аударылды.

Өткен жылы 20 млн шаршы метрден астам тұрғын үй пайдалануға берілді; Тоқаев мұны бұрын-соңды болмаған көрсеткіш деп атады. Орташа өмір сүру ұзақтығы 76 жасқа жақындады. Тоқаев Дүниежүзілік банк деректеріне сүйене отырып, Қазақстанның бұл көрсеткіш бойынша өңірде көшбасшы екенін айтты.

Президент сондай-ақ елдің әлемдегі ең ықпалды елдер қатарына 34-орынмен енгенін, жалпы ішкі өнім көлемі 350 млрд долларға жақындағанын және ТМД бойынша екінші орында тұрғанын айтты. Шағын және орта бизнестің ІЖӨ-дегі үлесі 40 пайызға жетті, еңбекке қабілетті азаматтардың жартысына жуығы осы салада жұмыс істейді.