Oʻzbekistonning JSTga aʼzolik jarayoni Senatda muhokama qilindi

Jahon savdo tashkiloti (JST) aʼzolari Oʻzbekistonda amalga oshirilayotgan keng miqyosli iqtisodiy islohotlarni ijobiy baholamoqda. Bu fikr Senatda oʻtkazilgan “dumaloq stol”da bildirildi. Tadbir mamlakatning JSTga aʼzolik jarayonlari va kutilayotgan amaliy natijalari mavzusida Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi tomonidan Prezidentning JST boʻyicha vakilligi xizmati bilan hamkorlikda tashkil etildi.

Prezidentning JST boʻyicha vakili va bosh muzokarachisi Azizbek Urunov xorijiy davlatlar bilan 40 dan ortiq muzokara raundi oʻtkazilganini, 34 dan ortiq davlat bilan muzokaralar yakunlanganini hamda 70 dan ortiq milliy qonun hujjati JST talablariga muvofiqlashtirilganini maʼlum qildi. Intellektual mulkni roʻyxatga olish jarayonlari soddalashtirildi, ortiqcha eksport cheklovlari esa bekor qilindi.

Ishtirokchilar aʼzolik Oʻzbekistonning tashqi savdo imkoniyatlarini kengaytirishi, eksport salohiyati va investitsion jozibadorligini oshirishi hamda mahalliy ishlab chiqaruvchilarning raqobatbardoshligini mustahkamlashini taʼkidladilar. Shuningdek, tashqi iqtisodiy qonunchilikni JST qoidalariga toʻliq muvofiqlashtirishni davom ettirish, qolgan muzokaralarni yakunlash va aʼzolikni rasmiylashtirish zarurligi qayd etildi.