Qozogʻistonda 2026-yildan 15% daromad soligʻi kimlarga tegishli boʻladi?

2026-yil yanvaridan Qozogʻistonda jismoniy shaxslar daromad soligʻining (JDS) ikkinchi stavkasi – 15% amal qila boshladi. U ish haqining barcha qismiga emas, balki belgilangan chegaradan oshgan daromadga qoʻllanadi, shu sababli aksariyat xodimlar hali ham 10% toʻlaydi. Bu haqda iqtisodchi Ruslan Sultanov «Iqtisodiy likbez» Telegram kanalida xabar berdi.

Ekspertning soʻzlariga koʻra, 15% stavkasi yillik soliqqa tortiladigan daromad 8 500 oylik hisoblash koʻrsatkichidan (2026-yilda 36 762 500 tenge) oshganda qoʻllanadi. Bu oyiga taxminan 3 064 000 tenge degani. Majburiy pensiya badallari, tibbiy sugʻurta va asosiy soliq chegirmasi hisobga olingach, oylik ish haqi boʻyicha chegara taxminan 3,59 mln tengeni tashkil etadi. 2026-yilning II choragida oʻrtacha nominal ish haqi 486 ming tenge, mediana 348 ming tenge boʻldi.

Ekspert keltirgan misolda oyiga 4 mln tenge oladigan shaxs uchun qoʻshimcha soliq yiliga 223 625 tenge, yaʼni oyiga taxminan 18,6 ming tenge boʻladi. Bu yillik hisoblangan ish haqining 0,5%dan kam. Sultanov 15% stavkasi faqat chegaradan oshgan qismga tegishli ekanini taʼkidladi.