Tailand Oʻzbekiston fuqarolari uchun 15 kungacha vizasiz rejimni qayta tiklashni koʻrib chiqmoqda

Tailand hukumati Oʻzbekiston, Kolumbiya va Meksika fuqarolari uchun 15 kungacha vizasiz kirish rejimini kengaytirishni koʻrib chiqmoqda. The Nation nashriga koʻra, Turizm va sport vazirligi shu yuzasidan takliflar tayyorlamoqda. Tashabbus viza arizalarini uzoq koʻrib chiqish muammosini hal qilish va uzoq mamlakatlardan sayohatlarni ragʻbatlantirishga qaratilgan.

Aviakompaniyalar avgust oxirida kuchga kirgan yangi kirish qoidalari tufayli qiyinchiliklarga duch kelmoqda. Emirates Meksikaga bronlarning bekor qilinishi sababli Tailand Turizm boshqarmasiga shikoyat qildi. Kompaniya maʼlumotiga koʻra, har bir reysda 20 dan 30 gacha yoʻlovchi vizani oʻz vaqtida rasmiylashtira olmagani sababli sotib olingan chiptalardan foydalanmagan. Vazir Surasak Pancharunvorakul Meksikalik sayyohlar uchun viza muammolarini tasdiqladi. Taklif Viza siyosati qoʻmitasiga kiritiladi.

Oʻzbekistonlik sayyohlar esa Rossiyadagi Tailand elchixonasi orqali toʻlov talab qiladigan elektron viza tartiblariga duch kelmoqda. Shu sababli mahalliy turoperatorlar Tailandga turlardan voz kechib, Vyetnam kabi muqobil yoʻnalishlarni tanlamoqda. Avgust oxirida Tailand Oʻzbekiston va yana 92 davlat uchun 60 kunlik vizasiz rejimni bekor qildi. Aviasales maʼlumotlariga koʻra, sentyabrda oʻzbekistonliklarning Tailandga aviachipta qidiruvi 81%, bronlar esa 84% ga kamaygan.