Qozogʻiston: Toqayev minimal ish haqini 100 ming tengega oshirishni topshirdi

Qozogʻiston Prezidenti Qosim-Jomart Toqayev xalqqa murojaatida minimal ish haqini 85 ming tengedan 100 ming tengegacha oshirishni hukumatga topshirdi. Xabarni Akordaga tayanib NUR.KZ yetkazdi. Toqayevning soʻzlariga koʻra, bu vazifa kelgusi yilning 1-yanvaridan bajarilishi kerak va u 1,8 million kishining, jumladan byudjetdan maosh oladigan 370 mingdan ortiq xodimning daromadini oshiradi.

Prezident, shuningdek, birlamchi tibbiy-sanitariya yordami tizimini modernizatsiya qilishga katta ahamiyat berayotganini taʼkidladi. Umumiy amaliyot shifokorlarining vakolatlarini kengaytirish va tizimni moliyalashtirishni bosqichma-bosqich oshirish rejalashtirilmoqda. Hukumatga bu sohada ishlaydigan mutaxassislarning ish stajiga qarab maoshini 40 foizga oshirish topshirildi. Bu kelgusi yil 1-yanvardan boshlanadi va 77 mingdan ortiq mutaxassisning daromadini oshiradi.