The Lancet: iqlim oʻzgarishining sogʻliqqa taʼsiri soʻnggi 10 yilda oshdi

Tibbiyot jurnali The Lancet tomonidan eʼlon qilingan “2026 Lancet Countdown” hisobotiga koʻra, iqlim oʻzgarishining sogʻliqqa taʼsiri soʻnggi 10 yilda global miqyosda kuchaydi. Hisobotda 2015-yilgi Parij iqlim kelishuvidan beri erishilgan yutuqlarga qaramay, iqlimga bogʻliq sogʻliq xavflari tezlashayotgani qayd etilgan va “global sogʻliqni saqlash favqulodda holati” eʼlon qilish chaqirilgan.

University College London rahbarligida, Jahon sogʻliqni saqlash tashkiloti (JSST) hamkorligida, 100 dan ortiq muassasadan 146 tadqiqotchi ishtirokida tayyorlangan hisobotga koʻra, 2016–2023-yillarda jazirama issiqlar dunyoda har yili oʻrtacha 540 mingdan ortiq odamning oʻlimiga sabab boʻlgan. Bu oʻlimlarning 68 foizi bevosita iqlim oʻzgarishi bilan bogʻliq. 2023-yilda issiqlar bilan bogʻliq oʻlim soni taxminan 710 mingga yetgan.

Hisobotda jazirama issiqlar sabab boʻlgan mehnat va ishlab chiqarish yoʻqotishlari tufayli 2025-yilda dunyoda 1 trillion dollardan ortiq potensial daromad yoʻqotilgani hisoblangan. Toza energiyaga global investitsiyalar 2025-yilda 2,1 trillion dollarga yetgan boʻlsa-da, global energiya taʼminotining 80 foizdan ortigʻini qazilma yoqilgʻilar taʼminlashda davom etmoqda.