Oʻzbekistonda 6500 ga yaqin dori vositasi narxi pasaytirildi

Oʻzbekistonda hozirgacha qariyb 6500 turdagi dori vositasi narxi pasaytirildi, ayrim preparatlar 40–60 foizga arzonlashdi. Bu haqda Farmatsevtika tarmogʻini rivojlantirish agentligi direktori Abdulla Azizov Samarqandda oʻtkazilgan «Bolalar farovonligiga sarmoya» butunjahon sammiti doirasida OAV vakillariga bergan intervyusida maʼlum qildi.

Azizovning soʻzlariga koʻra, narxlarni tartibga solish bosqichma-bosqich amalga oshirilmoqda. 2025-yil 1-dekabrda eʼlon qilingan oʻzgarishlar 2026-yil 1-martdan kuchga kirgan va dastlab 2000 turdagi dori narxi tushirilgan. 1-iyuldan yana 2000 ta preparat, sentabrdagi tekshiruvda esa taxminan 2000 turdagi dori narxi qayta koʻrib chiqilgan. Asosiy maqsad sunʼiy oshirilgan narxlarning oldini olish ekani, barcha dorilar narxini birdaniga 30 foizga tushirish esa ayrim dorilarning bozordan yoʻqolishiga olib kelishi mumkinligi taʼkidlandi.

Yanvar–avgust oylarida qariyb 670 ta dori vositasi Oʻzbekistonga olib kirilmagani aniqlangan, biroq ularning deyarli barchasining muqobili bor edi; atigi 38 turdagi preparatning oʻrnini bosadigan boshqa dori yoʻq edi. Azizov elektron retsept tizimi hali toʻliq ishga tushmaganini ham tan oldi.