Pashinyan: Ozarbayjon bilan tinchlikka muqobil yoʻq, maqsad 400 yil yoki undan koʻp

Armaniston Bosh vaziri Nikol Pashinyan Ozarbayjon bilan tinchlikka muqobil yoʻqligini bildirib, uni institutsional darajada mustahkamlash muhimligini taʼkidladi. News-Armenia xabariga koʻra, u hukumat rahbari sifatida asosiy ustuvor vazifasi qaytarib boʻlmas va uzoq muddatli tinchlikni taʼminlash ekanini aytdi.

Pashinyan Ozarbayjon bilan tinchlik bitimi imzolanishi va ratifikatsiya qilinishi kerakligini qayd etdi. U jahon voqealari fonida uzoq muddatli tinchlikni taʼminlashning ahamiyatiga eʼtibor qaratdi.

Bosh vazir shunday dedi: “Dunyoda sodir boʻlayotgan voqealarga qarasak, dunyo tartibi aslida parchalanayotganini tushunamiz. Baxtimizga, bu davrda tinchlikka erisha oldik. Biroq vazifamiz ikki yillik tinchlikni 20 yilga, bir yillikni 200 yilga, 200 yillikni esa 400 yil yoki undan ham uzoq muddatga aylantirishdir.”