Oʻzbekneftgaz Fargʻona neft qayta ishlash zavodini qaytarish taklifini bermagan

«Oʻzbekneftgaz» Fargʻona neft qayta ishlash zavodi (FNQIZ) davlat mulkiga qaytarilganidan keyin uni oʻz tarkibiga qaytarish boʻyicha taklif bermagan. Bu haqda 27-oktabr kuni oʻtkazilgan matbuot anjumanida «Oʻzbekneftgaz» boshqaruvi raisining birinchi oʻrinbosari Suhrob Hamrayev jurnalistlar savollariga javob berib maʼlum qildi.

Hamrayevning aytishicha, zavod 2018 yilda Davlat aktivlarini boshqarish agentligiga (Davaktiv) oʻtkazilganda kompaniya tarkibidan chiqqan, keyinchalik esa xususiylashtirishga qoʻyilgan. Davaktiv aktivni kelgusida boshqarish boʻyicha bir nechta variantlarni oʻrganayotgani, jumladan boshqaruv tizimini oʻzgartirish, «Oʻzbekneftgaz»ga qaytarish, yangi investorlarni jalb etish yoki qayta xususiylashtirish mumkinligi taʼkidlangan. Biroq zavodni «Oʻzbekneftgaz»ga topshirish boʻyicha yakuniy qaror qabul qilinmagan.

Davlat aktivlarini boshqarish agentligi direktori Sohibjon Murodov 8-oktabr kuni zavodning davlat ixtiyoriga qaytarilishini investorning moliyaviy qiyinchiliklari bilan izohlagan. Shartnomaga koʻra, toʻlovlar uch oy kechiktirilsa, sotuvchi bitimni bir tomonlama bekor qilish huquqiga ega edi. FNQIZ 2025 yil yakunlariga koʻra 538,1 mlrd soʻm zarar koʻrgan. 2026 yil iyun oyi boshida zavod toʻliq davlat mulkiga oʻtgan.