Daxlsizlik huquqini buzganlik uchun jinoiy javobgarlik belgilandi

Oʻzbekiston Prezidenti 14-oktabr kuni imzolagan qonun bilan daxlsizlik va immunitetga ega shaxslarga nisbatan ish yuritishning oʻziga xos tartibi belgilandi.

Daxlsizlikka ega shaxslar qatoriga Oliy Majlis Qonunchilik palatasi deputatlari va Senat aʼzolari, inson huquqlari boʻyicha vakil (ombudsman), bolalar huquqlari boʻyicha vakil, sudyalar, prokurorlar, tergovchilar, advokatlar, Markaziy saylov komissiyasi aʼzolari hamda Prezidentlikka nomzodlar (nomzodlik davrida) kiradi. Prezident Administratsiyasining boshqaruv xodimlari esa ishdan boʻshatilganidan keyin besh yil davomida, Administratsiyadagi vazifalari bilan bogʻliq boʻlmagan harakat yoki harakatsizligi uchun daxlsizlikka ega boʻladi. Oʻzbekiston Respublikasi Prezidenti, Prezident Administratsiyasining mansabdor shaxslari va ularning oila aʼzolari immunitetga ega; parlament aʼzolari esa ovoz berish va fikr bildirish uchun immunitetdan foydalanadi.

Daxlsizlikka ega shaxsni ushlab turish va huquqni muhofaza qiluvchi organga olib kelish taqiqlanadi. Istisno — Jinoyat-protsessual kodeksining 221-moddasi 1-bandida nazarda tutilgan holatlar boʻlib, bunda shaxs jinoyat ustida yoki undan keyin darhol qoʻlga tushsa, uch soatgacha ushlab turish mumkin. Daxlsizlikka ega shaxslarni jinoiy javobgarlikka tortish uchun tegishli palata, Prezident yoki boshqa vakolatli organning roziligi talab etiladi: deputatlar uchun tegishli palataning, Prezident Administratsiyasi boshqaruv xodimlari uchun esa Bosh prokurorning taqdimnomasi asosida Prezidentning yozma roziligi kerak.