Oʻzbekistonda suv va kanalizatsiya qarzi 542,6 mlrd soʻmga yetdi

Oʻzbekistonda ichimlik suvi va kanalizatsiya xizmatlari boʻyicha aholi va korxonalarning umumiy qarzi 2026-yil 1-oktyabr holatiga koʻra 542,6 mlrd soʻmga yetgan. Bu haqda 30-oktyabr kuni Toshkentda oʻtkazilgan matbuot anjumanida “Oʻzsuvtaminot” AJ masʼul shaxslari maʼlum qilgan.

Qarzning 430,7 mlrd soʻmi fuqarolarga, 111,8 mlrd soʻmi esa yuridik shaxslarga tegishli. Hududlar kesimida eng katta qarz Toshkent shahrida – 92,9 mlrd soʻm qayd etilgan. Undan keyin Andijon viloyati – 74,1 mlrd, Toshkent viloyati – 61,6 mlrd va Fargʻona viloyati – 57 mlrd soʻm bilan kelmoqda.

2026-yilda qarzni undirish uchun notarius idoralari va sudlarga 167 783 ta ariza berilgan. Natijada 114 305 ta ijro varaqasi va sud buyrugʻi berilib, 110 563 ta hujjat Majburiy ijro byurosiga yuborilgan. Qoidaga koʻra, toʻlovlar har oyning 10-sanasigacha toʻliq amalga oshirilishi kerak. Oʻz vaqtida toʻlamagan isteʼmolchilarga avval yozma ogohlantirish beriladi, qarz toʻlanmasa, xizmatlar cheklanadi va qonunchilik doirasida choralar koʻriladi.