Oʻzbekiston yanvar–sentabrda importi eksportdan 13,7 mlrd dollarga oshdi

Yanvar–sentabr oylarida Oʻzbekistonning tashqi savdo aylanmasi 65,4 milliard dollarni tashkil etgan. Bu oʻtgan yilning mos davriga nisbatan 3,9 milliard dollar yoki 6,3 foizga koʻp. Hisobot davrida eksport hajmi 25,8 milliard dollarga teng boʻlgan, import esa 39,6 milliard dollarga yetgan.

Umumiy eksport kamaygan boʻlsa-da, oltinni hisobga olmaganda, tovarlar eksporti 31,6 foizga oʻsgan. Uning qiymati 13,3 milliard dollarni tashkil etgan. Toʻqqiz oy davomida Oʻzbekiston dunyoning 200 dan ortiq mamlakati bilan savdo qilgan.

Tashqi savdo aylanmasida eng katta ulush Xitoy hissasiga toʻgʻri kelgan — 23,2 foiz. Keyingi oʻrinlarni Rossiya — 16 foiz, Qozogʻiston — 6,5 foiz, Turkiya — 3,4 foiz va Afgʻoniston — 2,4 foiz bilan egallagan.