Oʻzbekiston toʻqqiz oyda xorijda qiyin ahvolda qolgan qariyb 5 ming fuqarosini qaytardi

Migratsiya agentligi xabar berishicha, 2026-yilning 9 oyida xorijda ogʻir vaziyatga tushgan oʻzbekistonliklarni qoʻllab-quvvatlash uchun 22,4 mlrd soʻm yoʻnaltirilgan. Shu mablagʻlar hisobidan 4 968 nafar fuqaro vatanga qaytarilgan, bunga 20 mlrd 396 mln soʻm sarflangan.

Shuningdek, 1 171 nafar fuqaroga bir martalik moddiy yordam (1 mlrd 563 mln soʻm), 167 nafarga vaqtincha yashash joyi (xostel/boshpana) taʼminlangan (249 mln soʻm), 38 nafar fuqaroning tibbiy xizmat xarajatlari qoplab berilgan (228,6 mln soʻm). Toʻqqiz oy davomida 817 nafar fuqaro maosh va kompensatsiyalarni olishda muammoga duch kelib Agentlikka murojaat qilgan, oʻzbekistonliklar foydasiga jami 850 ming AQSH dollari undirib berilgan.

Holatlarning asosiy qismi, yaʼni 533 tasi Rossiya Federatsiyasi, 155 tasi Turkiya, 92 tasi Janubiy Koreya bilan bogʻliq, 37 tasi boshqa davlatlarga toʻgʻri keladi. Xabarda, shuningdek, 2026-yilning yanvar–iyun oylarida chet eldan Oʻzbekistonga yuborilgan pul oʻtkazmalari 13 foizga oshib, 9,3 milliard dollarga yetgani qayd etilgan.