Qirgʻiziston: soʻnggi yillarda politsiya xodimlarining maoshi ikki baravar oshdi

Qirgʻiziston Vazirlar Mahkamasi raisi Adilbek Qosimaliyev politsiya xodimlarini kasbiy bayram bilan tabrikladi. Tabrikda u ichki ishlar organlari xodimlari va faxriylariga minnatdorchilik bildirdi, jamoat tartibini taʼminlash hamda jinoyatchilik va korrupsiyaga qarshi kurashdagi natijalarni qayd etdi.

Uning maʼlumotiga koʻra, soʻnggi yillarda politsiya xodimlarining oylik maoshlari ikki baravar, Batken viloyatidagi xodimlarniki esa toʻrt baravar oshdi. 2021-2026 yillarda 724 nafar politsiya xodimi uy-joy bilan taʼminlandi. Soʻnggi toʻrt yil ichida vazirlik avtoparki 95 foizga yangilandi, 200 dan ortiq obʼekt qurildi.

Shuningdek, 10 mingdan ortiq videokamera oʻrnatilgani, koʻchma qabulxonalar va raqamli ekspertiza markazlari ishga tushirilgani aytildi. Qosimaliyevning maʼlumotiga koʻra, avvalgi yillarga nisbatan jinoyatlar qayd etilishi 78 foizga, qoʻpol tartib buzilishlari 69 foizga kamaygan.