Oʻzbekistonda 27 million fuqaroning shaxsiy maʼlumotlari darknetga sizib chiqishi mumkin

Ijtimoiy tarmoqlarda Oʻzbekistonning 27 million fuqarosi shaxsiy maʼlumotlarining darknetga sizib chiqishi mumkinligi haqida xabarlar tarqaldi. Bazada ism-familiya, telefon raqamlari, PINFL, yashash manzillari, pasport maʼlumotlari va biometrik fotosuratlar boʻlishi mumkin. Hujumchilar talablari 2-noyabr soat 08:00 gacha bajarilmasa, arxiv ochiq sotuvga chiqarilishini bildirdi.

Bloger Umid Gʻafurovning xabar berishicha, dasturchi sentabr oxirida vazirlik platformasida CVSS boʻyicha 8,6 ballik jiddiy zaiflikni aniqlagan. Zaiflik tufayli avtorizatsiyasiz foydalanuvchilar qariyb 40 million kishining maʼlumotlarini koʻrishi mumkin edi. Vazirlik xatolikdan xabardor ekanini, lekin uni shoshilinch deb hisoblamasligini aytdi.

Beshinchi kuni zaiflik hali ham ochiq edi. Dasturchi Kiberxavfsizlik markaziga murojaat qildi va muammo murojaatdan 8 kun oʻtib, qisman bartaraf etildi. Dasturchi hisob-kitoblariga koʻra, maʼlumotlar firibgarlar qoʻliga tushsa, har bir inson uchun taxminan 50 dollar, mamlakat miqyosida esa 2 milliard dollar zarar yetishi mumkin edi. Shuningdek, SAFE Service platformasi foydalanuvchilarining maʼlumotlari sizib chiqishi haqidagi xabarlar tekshirilmoqda.