Oʻzbekistonda reklama SMS va qoʻngʻiroqlar boʻyicha yangi qoidalar joriy etiladi

Oʻzbekistonda 1-noyabrdan reklama xarakteridagi SMS xabarlarni yuborish va reklama qoʻngʻiroqlarini amalga oshirish boʻyicha yangi qoidalar kuchga kiradi. Kompaniyalar va mobil operatorlar abonentlarga reklama xabarlarini faqat foydalanuvchilarning oldindan roziligi boʻlgan taqdirdagina yubora oladi. Rozilik yozma yoki elektron shaklda rasmiylashtirilishi kerak. Talab mobil aloqa orqali reklama tarqatuvchi tashkilotlar va jismoniy shaxslarga taalluqli.

Yangi qoidalar reklama murojaatlariga vaqt cheklovlarini ham belgilaydi. Mobil tarmoqlar orqali reklama xarakteridagi qoʻngʻiroq va SMS xabarlarni soat 18:00 dan 09:00 gacha yuborish taqiqlanadi. Abonentlar bunday xabar va qoʻngʻiroqlarni olish-olmaslikni mustaqil ravishda belgilash imkoniyatiga ega boʻladi. Reklamani toʻliq yoki qisman cheklashni xohlagan foydalanuvchilar aloqa operatoriga bloklash boʻyicha soʻrov bilan murojaat qilishlari mumkin.

Ommaviy reklama yuborish bilan shugʻullanuvchi kompaniyalar foydalanadigan tizimlarini shaxsiy maʼlumotlarni qayta ishlashning davlat reyestrida roʻyxatdan oʻtkazishi kerak. Qoidalarni buzganlik uchun javobgarlik nazarda tutilgan. Hujjatda, shuningdek, 2026-yil 1-oktyabrdan boshlab fuqarolarning shaxsiy maʼlumotlari oʻzgarganda, maʼlumotlar idoralararo maʼlumot almashinuvi tizimi orqali barcha tegishli davlat bazalarida avtomatik yangilanishi qayd etilgan.