Oʻzbekistonda importda ortiqcha toʻlangan QQSni hisobga olish tartibi belgilandi

Oʻzbekistonda tovarlarni import qilish va realizatsiya qilishda toʻlanadigan qoʻshilgan qiymat soligʻi (QQS) summalarini oʻzaro hisobga olish tartibi belgilandi. Bu haqda Adliya vazirligi xabar berdi. Tegishli idoraviy hujjat 31-oktyabr kuni 3966-son bilan davlat roʻyxatidan oʻtkazilgan.

Yangi tartibga koʻra, soliq toʻlovchilar tovar va xizmatlarni realizatsiya qilishda QQS boʻyicha ortiqcha turgan mablagʻlardan import tovarlar uchun bojxonada toʻlanadigan QQSni qoplashda foydalanishi mumkin. Buning uchun soliq toʻlovchi bojxona yuk deklaratsiyasi orqali QQS summalarini oʻzaro hisobga olishni maʼlum qiladi. Bojxona qoʻmitasi ortiqcha toʻlov mavjudligini tasdiqlash uchun Soliq qoʻmitasiga soʻrov yuboradi.

Soliq qoʻmitasi hisobga olinishi mumkin boʻlgan summa haqida maʼlumot taqdim etadi va oʻzaro hisobga olish dalolatnomasi avtomatik shakllantiriladi. Shundan soʻng Bojxona qoʻmitasi tegishli summani soliq toʻlovchining bojxona organlaridagi shaxsiy hisobvaragʻida aks ettiradi hamda bojxona yuk deklaratsiyasini rasmiylashtiradi. Adliya vazirligiga koʻra, mazkur tartib tadbirkorlar uchun importda qulaylik yaratishga qaratilgan. Avvalroq Oʻzbekistonda toʻqqiz oyda korxonalarga 16 trln soʻmdan ortiq QQS qaytarilgani haqida xabar berilgandi.