Özbəkistanda idxalda artıq ödənilmiş ƏDV-nin uçota alınma qaydası müəyyən edildi

Özbəkistanda idxal edilən mal və satış zamanı ödənilən əlavə dəyər vergisi (ƏDV) məbləğlərinin qarşılıqlı uçota alınması qaydası müəyyən edilib. Bu barədə Ədliyyə Nazirliyi məlumat verib. Müvafiq idarəetmə sənədi 31 oktyabr tarixində 3966 nömrəli qeydlə dövlət reyestrindən keçib.

Yeni qaydaya görə, vergi ödəyiciləri mal və xidmətlərin satışı üzrə ƏDV-yə görə artıq qalan vəsaitdən, idxal malları üçün gömrükdə ödənilən ƏDV-ni ödəmək üçün istifadə edə bilərlər. Bunun üçün vergi ödəyicisi gömrük yük bəyannaməsi vasitəsilə ƏDV məbləğlərinin qarşılıqlı uçotunu bildirir. Gömrük komitəsi artıq ödənişin mövcudluğunu təsdiq etmək üçün Vergi komitəsinə sorğu göndərir.

Vergi komitəsi uçota alına biləcək məbləğ barədə məlumat təqdim edir və qarşılıqlı uçot aktı avtomatik formalaşır. Sonra Gömrük komitəsi müvafiq məbləği vergi ödəyicisinin gömrük orqanlarındakı şəxsi hesabında əks etdirir və gömrük yük bəyannaməsini rəsmiləşdirir. Nazirliyə görə, bu qayda sahibkarlar üçün idxalda rahatlıq yaratmağa yönəlib. Daha əvvəl dokuz ayda Özbəkistanda müəssisələrə 16 trilyon somdan çox ƏDV qaytarıldığı bildirilmişdi.