Azərbaycanın 2027-ci il ÜDM-i 141 milyard manat proqnozlaşdırılır

Azərbaycanda 2027-ci ildə ümumi daxili məhsulun (ÜDM) 141 milyard manat həcmində olacağı proqnozlaşdırılır. Bu, 2026-cı ilə nisbətən 2,7 faiz real artım deməkdir.

AZERTAC-ın məlumatına görə, Maliyyə naziri Sahil Babayev bunu Azərbaycan Respublikasının 2027-ci il dövlət büdcəsi haqqında qanun layihəsini birinci oxunuşda parlamentin iqtisadi siyasət, sənaye və sahibkarlıq komitəsinin iclasında təqdim edərkən deyib.

Nazir həmçinin neft-qaz sektoru istisna olmaqla ÜDM-in 109,1 milyard manat həcmində proqnozlaşdırıldığını və bunun 2026-cı ilə nisbətən 4,4 faiz real artım demək olduğunu bildirib. 2023-2027-ci illəri əhatə edən beş illik perspektivə toxunan nazir, qeyri-neft-qaz sektorunda ÜDM-in 30 milyard manatlıq artım hədəfinə çatacağını və bunun 38 faiz artım olduğunu vurğulayıb.