Baş nazir Üstel: Yeni dövrün ilk qanunu şərtsiz bədəlli hərbi xidmət olacaq

Şimali Kipr Türk Respublikasının (ŞKTR) Baş naziri və Milli Birlik Partiyasının (UBP) sədri Ünal Üstel, hökuməti qurduqları təqdirdə Məclisdən keçirəcəkləri ilk qanunun bədəlli hərbi xidmət tənzimlənməsi olacağını bildirib. UBP-nin «Böyük Görüş» namizəd təqdimat mərasimində çıxış edən Üstel, gənclərə yönəlmiş çoxsaylı layihə və dəstək proqramlarının olduğunu vurğulayıb.

Üstelin sözlərinə görə, Türkiyədə tətbiq olunan bədəlli hərbi xidmət modeli ŞKTR-də də tətbiq olunacaq və bu xidmətdən yararlanmaq üçün xaricdə işləmək və ya akademik təhsil almaq şərti qoyulmayacaq. O, hərbi xidmət səbəbindən gənclərin xaricə getməyə məcbur qaldığını və bunun ailələrə də təsir etdiyini deyib. Üstel həmçinin gənclərin 30 yaşdan əvvəl evlənməkdə çətinlik çəkdiyini bildirib.

Üstel müxalifətin layihəni həyata keçirə bilməyəcəyini iddia edəcəyini qeyd edib və «Bunu yalnız biz edə bilərik» deyib. O, CTP-nin bunu 20 ildə də həyata keçirə bilməyəcəyini söyləyib.