Zorlu: Türkiyə-Azərbaycan problemləri ailə daxilində müzakirə olunacaq

AKP Baş müavini Kürşad Zorlu, Türkiyə ilə Azərbaycanın inkişaf yollarında fərqlərin ola biləcəyini bildirdi, lakin münasibətləri gərginləşdirən məsələlərə toxunmadı. Ankarada Qırğızıstan Respublikasının müstəqillik günü tədbirində çıxış edən Zorlu, iki dövlətin bir-birinin qərarlarına və suverenlik hüququna hörmət etdiyini dedi. Zorlu bildirdi: «Problemlərimizi də ailə məclisimizin daxilində müzakirə etməyi bilirik, bizə yaraşan şəkildə».

Gərginliyin bir hissəsi Bakının ibtidai, orta və lisey məktəblərinə aid yeni qaydalarla bağlıdır. Bu qaydalar məktəb geyim formasının vahidliyini pozan və təhsilin laiklik prinsipinə ziddir əlavə geyim əşyalarını qadağan edir və nəticədə məktəblərdə başörtüsünün qadağan olunmasına gətirib çıxaracaq. Türkiyə Prezidentinin Baş müşaviri Oktay Saral 13 oktyabrda sosial şəbəkədə yazdı ki, «Azərbaycanda başörtülü şagirdlərin təhsil hüququnun əngəllənməsi qəbul edilməzdir!» Prezident Rəcəb Tayyib Ərdoğan hələ bu barədə açıqlama verməyib.

Azərbaycan-Türkiyə Parlamentlərarası Əlaqələr İşçi Qrupu bəzi türk media orqanlarında və siyasi dairələrdə Azərbaycana yönəlmiş tənqidlərdən «ciddi narahatlıq və kədər» duyduğunu bildirib. BBC Azərbaycan Xidmətinin ötürdüyünə görə, qrup Saralın və bəzi AKP deputatlarının açıqlamalarını «əsassız ittihamlar» adlandırıb və Türkiyədən Azərbaycanın daxili işlərinə müdaxilə etməməsini istəyib. AKP sözçüsü Ömər Çelik isə Türkiyədə Azərbaycana etiraz edən qrupların partiya və ya hökumətlə əlaqəsi olmadığını deyib.