Qırğızıstan Hökuməti 2026-cı ilin sonunadək “bazarın manipulyasiyası” üçün cinayət məsuliyyəti tətbiq etməyi planlaşdırır

Qırğızıstan Hökuməti 2026-cı ilin sonuna qədər “bazarın manipulyasiyası” üçün cinayət məsuliyyəti tətbiq etməyi planlaşdırır. AKIpress-in yaydığı xəbərə görə, tapşırığı Hökumətin sədri və Prezident Administrasiyasının rəhbəri Adılbek Kasımaliyev 29 sentyabr tarixli 653 saylı Hökumət qərarı ilə verib.

Cinayət Məcəlləsinə, Cinayət-Prosessual Məcəlləsinə və Hüquqpozmalar Məcəlləsinə “bazar manipulyasiyasının kriminallaşdırılmasını” nəzərdə tutan dəyişikliklər paketinin 2026-cı ilin IV rübündə qəbul edilməsi tapşırılıb. Məsul icraçılar kimi Ədliyyə Nazirliyi, Baş Prokurorluq, Daxili İşlər Nazirliyi, GKNB və Maliyyə kəşfiyyatı təyin edilib. Qanun layihəsinin bazar manipulyasiyası ilə yanaşı, rəqəmsal aktivlərin müsadirəsi və cinayət yolu ilə əldə edilmiş əmlakın ekvivalent dəyərinin qiymətləndirilməsi üçün hüquqi baza yaratması nəzərdə tutulur.

Sənəddə hansı bazarın nəzərdə tutulduğu və hansı cəzanın təklif edildiyi göstərilmir. Eyni qərarla Qırğızıstan Respublikasında cinayət fəaliyyətinin maliyyələşdirilməsinə və cinayət yolu ilə əldə edilmiş gəlirlərin leqallaşdırılmasına qarşı mübarizə üzrə 2026–2030-cu illər üçün Dövlət Strategiyası da təsdiq edilib.