Paşinyanın “anklavları dəyişək” təklifinə Bakıdan reaksiya

Azərbaycan və Ermənistan arasında sərhədlərin delimitasyonu, eləcə də anklav və eksklavların taleyi ilə bağlı müzakirələr davam edir. Ermənistanın baş naziri Nikol Paşinyanın sərhədlərin müəyyənləşdirilməsinə yanaşması bu məsələlərin həll mexanizmlərini yenidən gündəmə gətirib. Ərazi bütövlüyünün qorunması və mümkün ərazi mübadiləsinin hansı şərtlərlə həyata keçirilə biləcəyi diqqət mərkəzindədir.

Modern.az-a açıqlama verən “Sülh Körpüsü” təşəbbüsünün koordinatoru Fərhad Məmmədov, sərhədlərin delimitasyonu ilə anklav və eksklav məsələlərinin həlli fərqli proseslər olduğunu bildirib. O, sərhədin şimaldan cənuba doğru müəyyənləşdirilməsi ilə bağlı qərar qəbul edildiyini qeyd edib. Məmmədov, sərhədlərin dəyişdirilməsi məsələsi ortaya çıxarsa, bunun referendum yolu ilə həyata keçirilməli olduğunu vurğulayıb. Azərbaycanın ərazisinin 86,6 min, Ermənistanın ərazisinin 29 min 743 kvadratkilometr olduğunu xatırladıb.

F.Məmmədov, Azərbaycanın bu məsələdə tələsmədiyini və prosesin ümumi sülh gündəliyinin gedişindən asılı olduğunu bildirib. Konkret mərhələyə keçildikdə anklav və eksklav məsələsinin necə həll ediləcəyinin müəyyənləşəcəyini əlavə edib.