Azərbaycanın AQEM-ə sədrliyinin 2 il uzadılması ölkəmizə yüksək etimadın göstəricisidir

Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) sədrliyi daha 2 il uzadılıb. Milli Məclisin deputatı Soltan Məmmədov bu qərarı ölkənin beynəlxalq nüfuzunun, çoxtərəfli diplomatiyanın inkişafına verdiyi töhfələrin və qlobal miqyasda qazandığı yüksək etimadın bariz ifadəsi kimi qiymətləndirib. Day.Az xəbər verir ki, Trend-ə açıqlamasında deputat geosiyasi proseslərin mürəkkəbləşdiyi, dövlətlərarası etimadın zəiflədiyi bir dövrdə belə qərarın qəbul edilməsini Azərbaycanın uzaqgörən xarici siyasət kursunun nəticəsi adlandırıb.

S.Məmmədov qeyd edib ki, Azərbaycanın 2024-2026-cı illərdə AQEM-ə sədrliyi təşkilatın yüksək səviyyəli fəaliyyəti, konkret təşəbbüsləri və institusional nəticələri ilə yadda qalıb. Bu dövrdə Qadınlar Şurası və Maliyyə Sammiti yaradılıb, Aparıcı Universitetlərin Tərəfdaşlıq Şəbəkəsi fəaliyyətə başlayıb. O, həmçinin Azərbaycanın sədrliyi ilə 15 oktyabrda Bakıda keçirilən AQEM-in VII Zirvə Görüşündə çoxsaylı dövlət və hökumət başçılarının iştirakını tədbirin yüksək əhəmiyyətinin göstəricisi kimi vurğulayıb.

Deputat bildirib ki, sədrliyin uzadılması əldə edilmiş institusional nəticələrin möhkəmləndirilməsi və irəli sürülmüş təşəbbüslərin davam etdirilməsi üçün yeni imkanlar açır. Şərq-Qərb və Şimal-Cənub nəqliyyat dəhlizləri, eləcə də strateji layihələr regionun əsas bağlantı mərkəzinə çevrilməsinə töhfə verəcək, rəqəmsal inkişaf, süni intellekt strategiyası və «Azərbaycan 2030» proqramları isə sədrlik dövrünün məqsədlərinə nail olunmasına dəstək olacaq.