Quterreşin tələbi ilə TC və AB Kipr məsələsini müzakirə edəcək

Kipr rum lideri Nikos Xristodulidis Avropa Birliyi (AB) ilə Türkiyə arasında oktyabr ayı bitmədən yüksək səviyyəli görüş keçiriləcəyini elan edib. Brüsseldə keçirilən Avropa Şurasının Zirvəsinin ikinci günündə çıxış edən Xristodulidis, görüşün BMT Baş katibi Antonio Quterreşin tələbi ilə keçiriləcəyini bildirib. Nyu-Yorkdakı təmaslardan sonra bu barədə məlumat aldığını deyən Xristodulidis, görüş qərarından məmnun olduğunu söyləyib.

Xristodulidisə görə, görüşdə iki əsas məsələ müzakirə olunacaq: Kipr məsələsində danışıqların yenidən başladılması səyləri və AB-Türkiyə münasibətlərində irəliləyiş. O, AB-Türkiyə münasibətlərində irəliləyişin razılaşdırılmış çərçivədə Kipr danışıqlarının yenidən başlamasından asılı olduğunu bildirib. AB-nin prosesdə daha fəal rol oynamalı olduğunu vurğulayan Xristodulidis, Raffaele Fittonun yay aylarında Kipr məsələsi üzrə xüsusi nümayəndə təyin edilməsindən məmnunluq duyduğunu söyləyib.

Xəbərdə iki tərəf arasındakı münasibətlərin yay aylarından bəri gərginləşdiyi də qeyd edilib. Cyprus Mail-in diplomatik mənbələrə istinadən yazdığına görə, Kipr Respublikasının Xarici İşlər Nazirliyi avqust ayında bəzi xarici diplomatik missiyalardan Kipr mövzusunda məlumatlandırma tədbirinə qatılmamağı xahiş edib. BMT-nin Kipr üzrə şəxsi nümayəndəsi Maria Anxela Holquin isə diplomatik fürsət pəncərəsinin tədricən bağlandığı barədə xəbərdarlıq edib.