Qazaxıstanda nadir torpaq metalları üçün 20 perspektivli sahə müəyyənləşdirilib

Qazaxıstanda nadir və nadir torpaq metallarının axtarışı üçün təxminən 20 perspektivli sahə müəyyən edilib. Bunu Sənaye və Tikinti naziri Yersayın Naqaspayev Kurultayın çərşənbə günkü plenar iclasında bildirib. Nazir qeyd edib ki, ölkə 30 ildə ilk dəfə yeraltı sərvətlərini 1:50 000 miqyasında ətraflı öyrənməyə başlayıb. 100 min kvadrat kilometr ərazidə 20 layihə hazırlanıb.

Axtarışda peyk vasitəsilə məsafədən zondlama, aerogeofiziki çəkiliş və dronlar istifadə olunur. Məlumatlar süni intellekt proqramları ilə təhlil edilir. Nazir Avstraliya və Kanadada tətbiq olunan geokimyəvi üsuldan da danışıb. Onun sözlərinə görə, son 2-3 ayda 7 perspektivli sahə müəyyən edilib və ilin sonuna qədər qazma işləri ilə təsdiqlənəcək.

Mütəxəssislər arxiv geoloji materiallarını rəqəmsallaşdırırlar. Nazir bildirib ki, köhnə hesabatlar, xəritələr və çertyojlardan ibarət 4,8 milyon informasiya vahidi, yəni 500 terabayt məlumat rəqəmsallaşdırılıb.