Metsamor AES-in baş direktoru: Ermənistan Azərbaycanla enerji əməkdaşlığını nəzərdən keçirir

Ermənistan Atom Elektrik Stansiyasının baş direktoru Eduard Martirosyan bildirib ki, Ermənistan enerji sektorunda Azərbaycanla əməkdaşlığı inkişaf etdirmək niyyətindədir. APA-nın Moskva bürosunun xəbərinə görə, Martirosyan bu sözləri Rusiya Enerji Həftəsi çərçivəsində “3+3 Platforma: Cənubi Qafqazda sülh və təhlükəsizliyin dayaqı kimi enerji əməkdaşlığı” adlı dəyirmi masa müzakirəsində deyib.

Martirosyan Ermənistanın qonşu ölkələrlə enerji əlaqələrinin perspektivlərindən danışıb. Azərbaycana toxunaraq, artıq həyata keçirilmiş yanacaq təchizatını xatırladıb və gələcəkdə elektrik enerjisi təchizatının da mümkün ola biləcəyini bildirib.

O, çıxışında belə deyib: “Ermənistan enerji sahəsində qonşu ölkələrlə, yəni İran və Gürcüstanla, gələcəkdə isə Azərbaycanla əməkdaşlığı inkişaf etdirmək niyyətindədir.”