Rusiyada neft emalı zavodlarının modernizasiyası üzrə razılaşmaların müddəti 2027-ci ilin iyuluna uzadıldı

Rusiya hökuməti neft emalı güclərinin modernizasiyası üzrə razılaşmaların qüvvədə olma müddətini 1 iyul 2027-ci ilə qədər uzatdı. Eyni zamanda istehsal olunan benzinin keyfiyyətinə dair tələblər də dəyişdirildi. Müvafiq fərmanı Baş nazir Mixail Mişustin imzalayıb.

Sənədə görə, benzin üçün "5-ci sinif" uyğunluq tələbi əvəzinə yüksək oktan ədədi şərti müəyyən edildi. Tədqiqat metodu üzrə bu göstərici 92 və daha yuxarı olmalıdır. Belə yanacağın istehsalı və dövriyyəsinə Rusiya ərazisində icazə veriləcək. Yanacaq istehsalı planlarının icrasına dair hesabat formasına və razılaşmaların bağlanması qaydalarına da dəyişikliklər edilib.

Hökumət güzəştlər almaq üçün tələb olunan minimum investisiya həcmini 60 milyard rubldan 100 milyard rubla qaldırdı. Əsas vəsaitlərin istismara verilməsi müddəti isə 31 dekabr 2026-cı ilə uzadılıb. Daha əvvəl vitse-baş nazir Aleksandr Novak neft emalı müəssisələrinə dəstək tədbirlərinin işləndiyini və modernizasiya müddətlərinin təxirə salındığını bildirmişdi.