Başqırdıstanda evində 200-dən çox üzüm növü becərən ailə

Başqırdıstanın Nuriman rayonuna bağlı Pavlovka kəndində yaşayan Raziyə və Rəfqət İbrahimov cütlüyü, bütün həyətlərini tutan böyük istixanada 200-dən çox üzüm növü becərir. “Qazprom” şirkətində 38 il işləyib təqaüdə çıxan Rəfqət İbrahimov torpaqla məşğul olmaq marağının uşaqlıqdan olduğunu deyir.

İlk üzüm budaqlarını qohum və tanışlarından alan İbrahimov “İzabella” növü ilə başlayıb. Açıq sahədə becərmənin nəticə vermədiyini görüb istixana tikib. Peyvənd üsulu ilə yeni növlər yaradır: üç il əvvəl 120, keçən il 400, bu il 300 peyvənd edib. Günəş işığı çatışmazlığını aradan qaldırmaq üçün bu il natrium lampalı proyektorlar alıb.

Qışda istixanaya qar daşımaq əvəzinə, polistirol doldurulmuş geotekstil örtüklərdən istifadə edir. 2023-cü ildə Kazanda keçirilən sərgidə 78 növlə üç nominasiyada qalib gəlib. Başlanğıcda məqsədi ailəsi üçün idisə, indi təcrübəsini başqaları ilə bölüşmək və “Respublikamızda da üzüm becərmək mümkündür” mesajını vermək istəyir. Həyat yoldaşı, uşaqları və altı nəvəsi də bu işi dəstəkləyir.