Sankt-Peterburqa kütləvi dron hücumu: bir nəfər ölüb, beş nəfər yaralanıb

Sankt-Peterburq qubernatoru Aleksandr Beqlovun bildirdiyinə görə, Ukrayna Silahlı Qüvvələrinin etdiyi kütləvi dron hücumu nəticəsində bir nəfər ölüb, beş nəfər yaralanıb. APA-nın Rusiya bürosunun xəbərinə görə, Beqlov hücum nəticəsində 12 mənzilli binanın və iki şəxsi evin ziyan gördüyünü deyib.

Beqlovun sözlərinə görə, xilasedicilər Sankt-Peterburq Neft Terminalında, Ruçyi neft anbarında və Kolpino rayonundakı sənaye anbarlarında yanğınları söndürməyə davam edirlər.

Leninqrad vilayətində Ukrayna PUA hücumu nəticəsində 20 minə yaxın sakin elektrik enerjisiz qalıb. Vilayətin qubernatoru Aleksandr Drozdenkonun məlumatına görə, Qatçina şəhərində vurulan dronlardan birinin qalıqları çoxmənzilli yaşayış binasının üzərinə düşüb, xəsarət alanlar barədə məlumat verilməyib. Vsevolojsk rayonunda dron qalıqlarının yaşayış binasının üzərinə düşməsi nəticəsində bir qadın və üç uşaq xəstəxanaya yerləşdirilib. Drozdenko, vilayət üzərində ümumilikdə 135 PUA vurulduğunu bildirib. Pulkovo hava limanında 15 aviareys ləğv edilib, 25 reysin uçuşu gecikir.