Azərbaycana qarşı bəyanatların arxasında xarici dairələr dayanır

Azərbaycan Nazirlər Kabinetinin vahid məktəbli forması ilə bağlı qərarı Türkiyədə bəzi siyasi və ictimai dairələr tərəfindən narazılıqla qarşılanıb. Modern.az-a danışan Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə, ayrı-ayrı şəxslərin Azərbaycana qarşı bəyanatlarını Türkiyə dövlətinin mövqeyi kimi təqdim etməyin doğru olmadığını bildirib.

Deputat iki ölkə arasındakı münasibətlərin təsadüfi siyasi maraqlara deyil, tarixi qardaşlığa, xalqların birliyinə və möhkəm strateji tərəfdaşlığa əsaslandığını vurğulayıb. O, Türkiyə Prezidentinin bu məsələdə heç bir fikir bildirmədiyini və onun ətrafında və ya partiyasında olan bir neçə nəfərin münasibətlərə yaraşmayan fikirlərinin Türkiyə rəhbərliyinin mövqeyi olmadığını qeyd edib.

Mirzəzadə Türkiyədə bəzi şəxslərin bəyanatlarının arxasında xarici maraqların dayana biləcəyini istisna etməyib. Onun fikrincə, müəyyən qüvvələr iki ölkə arasında etimadsızlıq yaratmaqla hər iki ölkəni zəiflətməyə çalışır. Deputat əmin olduğunu bildirib ki, ayrı-ayrı şəxslərin açıqlamaları Azərbaycan-Türkiyə strateji müttəfiqliyinə xələl gətirə bilməz.