“SOCAR Türkiye” öhdəliklərinin yenidən maliyyələşdirilməsinə 1,6 milyard dollar cəlb edilib

SOCAR-ın törəmə şirkəti “SOCAR Türkiye” öhdəliklərinin yenidən maliyyələşdirilməsi (refinancing) çərçivəsində 1,6 milyard dollar cəlb edib. Sindikatlaşdırılmış maliyyələşdirmənin təşkilatçıları First Abu Dhabi Bank (FAB) və Mizuho Bank olub.

Şirkət bildirib ki, qlobal iqtisadiyyatda qeyri-müəyyənliyin davam etməsinə baxmayaraq, maliyyələşdirmə əlverişli şərtlərlə cəlb edilib. Beş illik sövdələşmənin zamini SOCAR-dır. Sindikatlaşdırılmış maliyyələşdirmədə Avropa, Uzaq Şərq və Yaxın Şərqdən 22 bank iştirak edib; müraciətlərin həcmi hədəflənən məbləği 1,8 dəfə üstələyib. Sövdələşmə əvvəlki kreditlər və bazardakı oxşar əməliyyatlarla müqayisədə daha uzun ödəmə müddəti və daha aşağı borclanma dəyəri ilə fərqlənir. Yenidən maliyyələşdirmə SOCAR üçün əlavə öhdəliklər yaratmır.

SOCAR-ın prezidenti və “SOCAR Türkiye”nin Direktorlar Şurasının sədri Rövşən Nəcəf bildirib ki, bu şərtlərlə maliyyələşdirmənin cəlb edilməsi beynəlxalq maliyyə institutlarının “SOCAR Türkiye”yə yüksək etimadını təsdiqləyir. Onun sözlərinə görə, beynəlxalq mənbələrdən maliyyələşdirmə SOCAR qrupunun likvidliyini artırır və layihələrin maliyyə institutları tərəfindən dəstəkləndiyini təsdiqləyir.