Şimali Kipr Türk Respublikasında işçilərin əksəriyyəti artıq xarici vətəndaşlardır

Avropa Birliyinin maliyyələşdirməsi ilə Dünya Bankının hazırladığı 2026 Makroiqtisadi İzləmə Hesabatına görə, Şimali Kipr Türk Respublikasında (ŞKTR) iş icazəsi alan xarici vətəndaşların qeydiyyatdan keçmiş məşğulluqda payı dörd ildə 36 faizdən 53 faizə yüksəlib.

Hesabata görə, 2021-ci ildə qeydiyyatdan keçmiş məşğulluğun 64 faizini kipr türkləri təşkil edirdi, Türkiyə Respublikası vətəndaşlarının payı 23 faiz, digər ölkə vətəndaşlarının payı isə 13 faiz idi. 2025-ci ilə gəldikdə kipr türklərinin payı 46 faizə enib, Türkiyə vətəndaşlarının payı 27 faizə, digər ölkə vətəndaşlarınınki isə 26 faizə çatıb.

Hesabata görə, ümumi işsizlik 4,7 faiz, gənclər arasında işsizlik 15,7 faiz səviyyəsində qalıb. Qadınların iqtisadi fəallıq göstəricisi 39,4 faiz, kişilərdə isə 65 faiz təşkil edib. Hesabatda yerli işçi qüvvəsi çatışmazlığının getdikcə artan şəkildə xarici işçilərlə doldurulduğu bildirilib.