C5+1 ölkələri: Trans-Xəzər marşrutu ABŞ-Mərkəzi Asiya ticarətini artıracaq

BAKI, Azərbaycan, 20 oktyabr. ABŞ Dövlət Departamentinin məlumatına görə, Trans-Xəzər Ticarət Marşrutunun inkişafına birgə səylər Mərkəzi Asiya ilə ABŞ arasında misli görünməmiş ikitərəfli ticarət və investisiyanı stimullaşdıracaq. Bu, ABŞ, Qazaxıstan, Qırğızıstan, Tacikistan, Türkmənistan və Özbəkistan hökumətlərinin Səmərqənddə C5+1 nazirlər görüşü münasibətilə yaydığı birgə bəyanatda bildirilir.

Bəyanata görə, ölkələr bölgədaxili ticarətin genişləndirilməsi, nəqliyyat əlaqələrinin təkmilləşdirilməsi, gömrük prosedurlarının uyğunlaşdırılması və sənaye əməkdaşlığının gücləndirilməsi yolu ilə Mərkəzi Asiyada regional iqtisadi inteqrasiyanı dəstəkləyir. Məqsəd ABŞ ilə əlaqəli rəqabətqabiliyyətli regional bazar yaratmaqdır.

Hökumətlər Mərkəzi Asiyada fəaliyyət göstərən Amerika şirkətləri üçün yeni imkanların yaranmasını və Mərkəzi Asiya müəssisələrinin ABŞ bazarında investisiya qoyması və fəaliyyət göstərməsi üçün genişlənən imkanları nəzərdə tutur. Bəyanatda etibarlı texnologiyalara əsaslanaraq elektron ticarətin inkişaf etdiyi, innovativ həllərin çoxaldığı regional mühit hədəflənir.