Azad edilmiş ərazilərdə Qarabağ Milli Parkı yaradılır

Azərbaycanda Qarabağ Milli Parkı yaradılır. Report xəbər verir ki, Prezident İlham Əliyev bununla bağlı Sərəncam imzalayıb. Sərəncama əsasən, park Ağdərə rayonundan 44773,79 hektar, Xocalı rayonundan 24597,80 hektar, Kəlbəcər rayonundan 13514,98 hektar, Şuşa rayonundan 5314,34 hektar və Laçın rayonundan 217,09 hektar dövlət mülkiyyətində olan torpaqlar hesabına, cəmi 88418,00 hektar sahədə yaradılır. Ərazilər xüsusi qorunan ərazilərin torpaqları kateqoriyasına aid edilib.

Sənəd xüsusi mühafizə olunan təbiət əraziləri şəbəkəsinin genişləndirilməsini, azad edilmiş ərazilərdə yeni belə ərazilərin yaradılmasını, regionun ekosisteminin beynəlxalq miqyasda tanıdılmasını, biomüxtəlifliyin bərpasını və dayanıqlı istifadəni, eləcə də ekoturizmin inkişafını məqsəd kimi müəyyən edir. Sərəncamda bildirilir ki, işğal altında olduğu müddətdə bu ərazilərdə bioloji müxtəlifliyə ciddi ziyan vurulub və Qırmızı Kitaba daxil edilmiş nadir növlər məhv edilib.

Nazirlər Kabinetinə sənəddən irəli gələn məsələləri həll etmək tapşırılıb. Bundan əlavə, Zəngilan rayonunda Bəsitçay Dövlət Təbiət Qoruğu və Şuşa və Xocalı rayonlarında Daşaltı Dövlət Təbiət Yasaqlığı Böyük Qayıdış çərçivəsində bərpa edilib.