ABŞ-ın dövlət katibi Rubio Özbəkistanda 12 milyard dollarlıq sazişlər imzalayıb

ABŞ dövlət katibi Marko Rubionun Özbəkistana səfəri zamanı tərəflər arasında çoxmilyardlıq investisiya və ticarət sazişləri imzalanıb. Bloomberg agentliyinin məlumatına görə, Rubio bazar axşamı Səmərqəndə gəlib və burada Özbəkistan prezidentinin qızı, onun administrasiyasının rəhbəri Saida Mirziyoyeva ilə görüşüb. Ümumi dəyəri 12 milyard dollar olan sazişlər aviasiyadan maliyyə xidmətlərinə və mədənçıxarma sahəsinə qədər geniş spektri əhatə edir.

Nəqliyyat sektorunda Uzbekistan Airways üçün mühərriklərin tədarükü ilə bağlı GE Aerospace ilə əməkdaşlıq sazişi elan edilib. Maliyyə sahəsində Franklin Templeton, Oppenheimer & Co., Citigroup və BlackRock özbək şirkətlərinin beynəlxalq kapital bazarlarına çıxışını asanlaşdırmaq məqsədilə sazişlər imzalayıb. Mədənçıxarma sektorunda ReElement Technologies və Trafigura ilə bağlı sazişlər elan olunub. Analitiklər qeyd edir ki, Vaşinqton kritik faydalı qazıntılar üzrə Çindən asılılığı azaltmağa çalışır.

Rubio Rusiya və Çinlə iqtisadi rəqabət barədə suala cavab verərək “Söhbət rəqabətdən gedir” deyib, lakin Vaşinqtonun regiondakı ölkələri digər dövlətlərlə əlaqələrini kəsməyə məcbur etmək niyyətində olmadığını əlavə edib. Lora Linderman isə C5+1 formatının Azərbaycanı da daxil edən C6+1 formatına genişləndirilməsinin daha böyük uğur olacağını bildirib. Rəsmi mənbələr bu imkana hələlik şərh verməyiblər.