Liviya Nümayəndələr Məclisi Türkiyə ilə dəniz memorandumunu təsdiqlədi

Liviya Nümayəndələr Məclisi 2019-cu ildə Türkiyə ilə imzalanmış dəniz yetki sahələrinin müəyyənləşdirilməsinə dair anlaşma memorandumunu yekdilliklə təsdiqləyib. Liviya parlamentinin açıqlamasına görə, məclis bununla əvvəlki qərarından, yəni sazişi rədd etmək və Ankara ilə siyasi əlaqələri kəsmək qərarından geri dönüb.

Məclis həmçinin Milli Barışıq Hökuməti ilə Türkiyə hökuməti arasında imzalanmış iki anlaşma memorandumunun təsdiqlənməsinin rədd edilməsinə dair 2020-ci il tarixli (1) saylı qərarı yekdilliklə ləğv edib.

Türkiyə Xarici İşlər Nazirliyi məclisin 20 oktyabr tarixində qəbul etdiyi qərardan məmnunluqla söz etdiyini bildirən yazılı açıqlama yayıb. Nazirliyə görə, memorandum beynəlxalq hüquq və ədalət prinsipləri əsasında iki ölkənin qarşılıqlı hüquq və maraqlarını nəzərə alır və əməkdaşlığın dərinləşməsinə töhfə verir. Açıqlamada Türkiyənin Aralıq dənizi hövzəsində etibar, sabitlik və sülhün təmin edilməsi üçün bütün tərəfdaşları ilə işləməyə davam edəcəyi vurğulanıb.