Qazaxıstanda lisenziyası olmayan altı kriptobirjanın fəaliyyətinə qadağa qoyulub

Astana Beynəlxalq Maliyyə Mərkəzinin (AIFC) məhkəməsi, lisenziyasız fəaliyyət göstərən altı kriptobirjanın Qazaxıstanda xidmət göstərməsini qadağan etdi. Qərar BingX, Bitcoin.com, Huobi Global (HTX), BitMart, Coinbase və WEEX platformalarına aiddir. Kapital.kz-in Maliyyə Xidmətlərinin Tənzimlənməsi Komitəsinə (AFSA) istinadən verdiyi məlumata görə, qadağa rəqəmsal aktivlərlə bağlı xidmətlərin reklamını və AIFC yurisdiksiyası daxilində hər hansı platforma vasitəsilə mobil tətbiqlərin yayılmasını da əhatə edir.

Məhkəmənin fikrincə, lisenziyasız fəaliyyət AFSA-nın tənzimləmə sistemini zəiflədir və AML/CFT tələblərinə əməl edən şirkətlər üçün haqsız rəqabət yaradır. LBank əvvəlcə siyahıya daxil edilsə də, Qazaxıstandakı istifadəçilər üçün xidmətini öz istəyi ilə bağladı. Google Play və Apple App Store operatorlarına bu xidmətləri bloklamaq üçün bildiriş göndərilib. AFSA xəbərdarlıq edib ki, lisenziyasız platformalar nəzarətdən kənardadır və onların müştərilərinə hüquqi müdafiə təmin edilmir.

Məhdudiyyətlər 2025-ci ildə, AFSA 20-dən çox platformaya yazılı xəbərdarlıq göndərdikdən sonra başlayıb. Sonradan doqquz platforma tətbiqlərini öz istəyi ilə bloklayıb, yeddi platforma isə lisenziya üçün müraciət edib.