Qazaxıstan dünya IT şirkətlərinə süni intellekt üçün hesablama gücü təqdim edəcək

Qazaxıstanın Ekibastuz şəhərində beynəlxalq IT şirkətlərinin süni intellekt işləyib hazırlamaq və öyrətmək üçün istifadə edə biləcəyi böyük məlumat mərkəzləri kompleksi tikilir. Xəbər 24KZ-yə istinadən verilir. Data Center Valley layihəsi xarici investisiyaları cəlb etməyi və ölkənin texnologiya sektoru üçün yeni imkanlar yaratmağı hədəfləyir.

Rəqəmsal aktivlər və inqilabi texnologiyalar komitəsinin sədri Joldas Sahanov layihənin mərhələlərlə həyata keçiriləcəyini və gücünün tədricən artırılacağını bildirib. Planlara görə məlumat mərkəzləri bir qiqavatadək genişləndiriləcək, ümumi gücü 300 meqavat olan obyektlərin gələn il istifadəyə verilməsi nəzərdə tutulur.

Firebird AI, AMD və Amazon da daxil olmaqla beynəlxalq texnologiya tərəfdaşları artıq layihəyə qoşulub. Xarici tərtibatçılar Qazaxıstandakı süni intellekt avadanlığından istifadə edə biləcək ki, bu da ölkəyə beynəlxalq müştərilərə rəqəmsal xidmətlər təklif etmək imkanı verəcək. Sahanov kilovatda təxminən 2,5 ABŞ sentlik elektrik qiymətini əsas rəqabət üstünlüyü adlandırıb və 500-dən çox yüksək ixtisaslı mütəxəssisin cəlb olunacağını deyib.