Petronas Türkmənistanda 30 ildə 12 milyard dollardan çox investisiya qoyub

Malayziyalı neft və qaz şirkəti Petronas, ölkədəki 30 illik fəaliyyəti ərzində Türkmənistana 12 milyard dollardan çox investisiya qoyub. Bu barədə Petronas-ın Upstream bölməsinin Əməliyyatlar üzrə direktoru (COO), icraçı vitse-prezidenti və baş icraçı direktoru Mohd Jukris Abdul Wahab Aşqabadda keçirilən “Türkmənistanın neft və qazı – 2026” (OGT 2026) beynəlxalq konfrans və sərgisində açıqlayıb.

Onun sözlərinə görə, şirkətin ölkədəki cari fəaliyyətinə açıq dəniz istehsal qurğuları, qaz emalı kompleksi, Kiyanly terminalı və əlaqəli infrastruktur daxildir. Jukris Abdul Wahab qeyd edib ki, Petronas-ın uzunmüddətli iştirakı yeni sazişlərlə dəstəklənir: açıq dəniz 19 və 20 nömrəli bloklar, şimal açıq dəniz bloklarında seysmik tədqiqatlar və 1 nömrəli blok üzrə məhsul bölgüsü sazişinin 25 il uzadılaraq 2050-ci ilə qədər müddətləndirilməsi.

“Etibarlı enerji gələcəyi bu gün təkcə resurslara və infrastruktura deyil, həm də texnologiyaya, ekspertizaya və uzunmüddətli artımı təmin edən əsaslara davamlı investisiyalar tələb edir”, – deyə o vurğulayıb. Upstream bölməsinin baş icraçı direktoru həmçinin bildirib ki, Petronas regional enerji təchizatı və tələbat mərkəzlərinin inteqrasiyasında daha mühüm rol oynamağa hazırdır. Petronas 1996-cı ildən Türkmənistanda fəaliyyət göstərir.